Гэмт хэргээс урьдчилан сэргийлэх ажлыг зохицуулах салбар зөвлөлийн ээлжит хуралдаан 2025.06.04-ний өдөр болж, сумын нутаг дэвсгэрт үүсч болзошгүй эрсдэл, зөрчлөөс урьдчилан сэргийлэх, иргэдийн аюулгүй байдлыг хангах чиглэлээр дараах арга хэмжээнүүдийг авч хэрэгжүүлэхээр шийдвэрлэлээ.

Хуралдаанаар дараах асуудлуудыг хэлэлцэж, хэрэгжүүлж ажиллах үүргийг сумын Засаг даргад өглөө.

Үүнд: 1.Ахмадын байрны хаалга, цонхыг битүүмжлэх – Уг байр нь хараа хяналтгүй, эвдэрсэн байдалтай байгаа тул гэмт хэрэг гарах, хүүхэд залуус орж бэртэх зэрэг эрсдэлээс сэргийлэх үүднээс яаралтай битүүмжлэх арга хэмжээ авах.

2.Хурдан морины уралдааны замын эрсдэлтэй хэсгүүдэд арга хэмжээ авах – “Алтан тариа” ХХК-ийн хогийн цэг, төв замтай ойр байрлал, тариан талбайн огцом эргэлт зэрэг нь морь, унаач хүүхдүүдэд аюул учруулах нөхцөлтэй байгаа тул нөхцөл байдлыг сайтар үнэлж, зохих хамгаалалтын арга хэмжээг авч хэрэгжүүлэх.

3.15–18 насны охидын үзлэг зохион байгуулах – Ерөнхий боловсролын сургуулийн зуны амралт эхлэхээс өмнө охидын эрүүл мэндийг дэмжих, урьдчилан сэргийлэх үзлэгийг зохион байгуулах, холбогдох байгууллагуудтай хамтран ажиллах.

4.Насанд хүрээгүй хүүхдүүдийн мотоцикл уналтаас үүсэх эрсдэлээс сэргийлэх – Хууль бус мотоцикл жолоодож буй сургуулийн насны хүүхдүүдийн тоо нэмэгдэж буй тул эцэг эхчүүдэд сэрэмжлүүлэг хүргэх, хяналт шалгалт зохион байгуулах, сургууль, цагдаагийн байгууллагатай хамтран мэдээлэл, сургалт зохион байгуулах арга хэмжээ авах. Салбар зөвлөлийн гаргасан дээрх чиглэлийн хүрээнд холбогдох арга хэмжээг хэрэгжүүлж, үр дүнгийн тайланг товлогдсон хугацаанд ирүүлэхийг сумын Засаг даргад даалгасан болно.